ஞாயிறு, ஜூலை 01, 2012

சேகரிக்கப்பட்ட தருணங்கள்

அடிபட்ட கரப்பானை
அடக்கம் செய்தன
எறும்புகள்

%%%%%

சதை வெந்துவிட்டது
இரத்த வாடை தான் இன்னும் போகவில்லை
விருந்துக்கு நேரமாச்சு..

%%%%%%

உறவுகளால் பேசப்படும் 
திருமணம். 
ஒரு பெண் செய்யும் 
மறுமணம்.

%%%%%

ஒரு மயில்
ஒரு மையில்
ஒரு மைல்
ஒருமையில்

%%%%%%%%

திட்டம்போட்டு யதார்த்தமாக
செய்யப்பட்ட ஒரு கொலையில்
நானும் கூட நடைபிணமே.!

%%%%%%

அசையாமல் 
அமர்ந்திருந்தால் 
நம் மீதும் 
ஈ மொய்க்கிறது.

%%%%%%

காலையில் எழுந்தவுடன்
கடிகாரம் பார்ப்பதுபோல
சூரியனை எட்டிப்பார்ப்பதைபோல
சூடாக ஒரு கப் காப்பி அருந்துவதைப்போல
வழக்கமாகிவிட்டது
இணைய உலா.

%%%%%%%%

நீந்த முடியாத மீன் முள் 
நடந்துச்சென்றது
மேஜைக்கடியில்..

%%%%%%

இரவெல்லாம் உறக்கமில்லை
ஏன் என்று கேட்டால்
ஒண்ணுமில்லை என்கிற
பொய் கலந்த உண்மையை 
சொல்லவேண்டிவருமே.!

%%%%%%%

ஒரு புத்தகத்தில் 
நுழைகின்ற போதெல்லாம்
உள்ளே, நான் இருக்கின்றேன்
என் பின்னே நீயும் வருகின்றாய்..

%%%%%%%%

காய்ந்துப்போன செடியில் 
ஒட்டிக்கொண்டிருக்கும் 
ஒரே ஒரு பச்சை இலையால், 
என் நம்பிக்கை சாய்ந்து விடவில்லை, 
தினமும் வேர்களை நோக்கி
நீர் பாய்ச்சியவண்ணம்
நான்..

%%%%%%%%%

கதை படித்தால்-கதையாக
கட்டுரை படித்தால் -கட்டுரையாக
துணுக்குகள் படித்தால்-துணுக்குகளாக
மாறிவிடும் நான்..
கவிதை படித்தால் மட்டும் 
நீயாகிப்போகிறேன்..

%%%%%%%

கீரையின் நடு நரம்பெடுத்து
வெங்காயத்தை துகிலுறித்து
வெள்ளப்பூண்டில் தோலுறித்து
மிளகாயை மொட்டையாக்கி
கத்தரிக்காயின் கழுத்தறுத்து
கொதிக்கும் எண்ணெயில் வதக்கி
கடையப்போகிறேன் புளிச்சக்கீரையை.

%%%%%%%%

முத்தமிட்டுக்கொண்டே இருந்தால், 
மழலைகூட 
வன்முறையைக் காட்டி, 
விலகி நிற்கும்.

%%%%%%%

நாளை நான் இல்லாமல் போகலாம் 
இன்று என்னால் சேகரிக்கப்படும்
இந்த தருணங்கள் வாழும்போது
இந்த வருகையும் அர்த்தமாகிவிடுமல்லவா!

%%%%%%%

அடிக்கிற வெயிலில்
ஆட்டிஃபிஷல் மலர் கூட 
வாடிவிடும்போது
எம்மலர் எம்மாத்திரம்!?

%%%%%%%